Ursina Giger ei naschida 1985 a Mustér ed ei era carschida si leu. Oz viva ella a Turitg. Gia sco buoba s’interessava ella per musica ed ella ha giu scolaziun da cant classic e clavazin. Suenter la matura eis ella ida a Turitg per far il cuors preliminar dalla Scola da jazz Turitg. 2006 ha ella entschiet cul studi da bachelor alla scola aulta da musica da Lucerna, nua ch’ella ha giu instrucziun tier Susanne Abbuehl e Lauren Newton. 2012 ha ella serrau giu il studi da master en pedagogia da musica. Denteren ha la musicista fatg in onn d’Erasmus a Kopenhagen nua ch’ella ha studegiau cant e cumposiziun al Rytmisk Musikkonservatorium tier Django Bates e Hanne Boehl. Duront quei temps ha Ursina Giger era entschiet a scriver e cumponer canzuns en romontsch ed engles. Dapi 2011 ei sia atgna band URSINA il project principal. Tochen ussa ein duas EPs «Time Is A Thief» (2013) e «Hiding Behind A Mask» (2014) ed igl album «You Have My Heart» (2017) cumpari sut il num URSINA. 2013 ha la band gudignau il Swiss Live Talents Award ellas categorias Public e National Language. Ursin Giger ha era gudignau il medem onn il premi da promoziun dil cantun Grischun. Sper l’atgna band ei Ursina Giger era part dil trio La Tirada cun Corin Curschellas ed Astrid Alexandre. Il trio dat a veglias canzuns popularas romontschas in niev vestgiu. Sco scolasta da cant da professiun eis ella era adina puspei engaschada sco scolasta da cant ni sco coach per bands tier l’uniun Helvetiarockt.
